× Карта сайта
Ovozli hamrohlik

Saytda ovozli hamkor mavjud.

matnni tinglash uchun uni sichqoncha bilan tanlang

Maxsus imkoniyatlar

Yangiliklar

Joriy yilning 14-may kuni Taʼlim sifatini nazorat qilish davlat inspeksiyasida Finlyandiyaning Xelsinki universiteti HY+ trening markazi vakillari bilan uchrashuv boʻlib oʻtdi. Unda Taʼlim inspeksiyasi boshligʻi Ulugʻbek Tashkenbayev, tegishli boshqarma va boʻlim boshliqlari hamda Finlyandiya faxriy konsuli Alisher Joʻrayev, malaka oshirish tizimi eksperti Xanne Koli va taʼlimda AKTni qoʻllash boʻyicha ekspert Petri Lunaskorpilar ishtirok etishdi. Taʼkidlash joizki, finlyandiyalik ekspertlar maktab oʻqituvchilariga 15–19-may kunlari “Taʼlimdagi oʻqitish metodikalari boʻyicha Finlyandiya tajribasi” mavzusida trening oʻtib berish uchun Navoiy viloyati hokimligi taklifiga binoan yurtimizga tashrif buyurishgan. Taʼlim inspeksiyasida oʻtkazilgan uchrashuv kun tartibidan Finlyandiya bilan taʼlim yoʻnalishidagi amalga oshirilgan hamkorlik aloqalarining bugungi kundagi holati, Navoiy viloyatida tashkil etiladigan 5 kunlik trening rejasi hamda kelgusida hamkorlik aloqalarining rivojlantirishga doir qator masalalar muhokama qilindi. Uchrashuv avvalida Taʼlim inspeksiyasi boshligʻi finlyandiyalik ekspertlarga mamlakatimiz taʼlim tizimini takomillashtirish boʻyicha koʻrsatilayotgan yordam uchun minnatdorchilik bildirar ekan, bu kabi loyihalar Oʻzbekiston va Finlyandiya mamlakatlari oʻrtasidagi yaqin hamkorlik aloqalarining yanada kengayib borishiga xizmat qilishini taʼkidladi. “Avvalo, mamlakatimizga amalga oshirgan tashrifingiz va mamlakatimiz oʻqituvchilariga oʻz tajribalaringizni boʻlishayotganingiz uchun minnatdorchilik bildiramiz. Finlyandiyaning taʼlim tizimiga, xususan, pedagoglarning oʻquv jarayonlariga yondashuvi juda qiziq. Oʻylaymanki, Navoiy viloyatida oʻtkaziladigan jarayonlar, pedagoglarimiz malaka va koʻnikmalarining oshishiga muhim omil boʻlib xizmat qiladi. Bu kabi loyihalar avvalo mamlakatimiz taʼlim tizimini takomillashtirish uchun va boshqa tomondan Oʻzbekiston va Finlyandiya oʻrtasidagi hamkorlik aloqalarining yanada kuchayib borishiga zamin yaratadi. Oʻtgan davr mobaynida fin tajribasini mamlakatimizga joriy etish, xususan, zamonaviy pedagoglarni tayyorlash, oʻquv dasturlarini takomillashtirish, darsliklarni yaratish boʻyicha koʻplab ishlar amalga oshirildi. Bundan tashqari, taʼlim sohasiga raqamli texnologiyalarni jalb qilish boʻyicha Xalq taʼlimi vazirligi bilan loyihalar yoʻlga qoʻyilgan. Bu borada ham Sizlarning qimmatli tajribalaringiz asqatishi shubhasiz”, – dedi Ulugʻbek Tashkenbayev. Oʻz navbatida HY+ trening markazi malaka oshirish tizimi eksperti Xanne Koli samimiy qabul uchun minnatdorchilik bildirar ekan, Navoiy viloyatida oʻtkaziladigan seminar treninglarning ahamiyati boʻyicha oʻz fikrlari bilan oʻrtoqlashdi. “Navoiy viloyatida oʻtkazilayotgan ushbu seminar-trening jarayonlari sinov tariqasida tashkil etilayotgan boʻlib, asosan, oʻqituvchilarning kasbiy mahoratlarini oshirishga qaratilgan. Finlyandiyada pedagoglarning asosiy koʻnikmalarini shakllantirishga alohida eʼtibor qaratiladi. Ammo sinfxonalardagi muhitni oshirib borish uchun barcha oʻqituvchilar malakasini oshirib borish zarur. Mazkur jarayonlar Xelsinkida Finlyandiya oʻqituvchilari uchun tuzilgan oʻquv dasturlari asosida oʻtkaziladi. Bunda esa maʼlumotlar qisqa videolarga ham jamlangan boʻlib, oʻqituvchilar kelgusida ushbu maʼlumotlarni qaytadan koʻrib chiqish imkoniyatiga ega boʻlishadi. Bu qaysidir maʼnoda pedagoglar uchun oʻziga xos kutubxona boʻlib xizmat qiladi. Mazkur videokurslardan Malayziya, Indoneziya, Braziliya kabi mamlakatlarda keng miqyosda foydalanib kelinmoqda. Shuningdek, mazkur loyiha Gruziya, Qozogʻiston kabi mamlakatlarda ham boshlangan. Bu kabi treninglar oʻqituvchilarga oʻz bilimlarini mustahkamlab borishlari uchun muhim omil boʻlib xizmat qiladi”, – dedi Xanne Koli xonim. Maʼlumot uchun, HY+ trening markazi malaka oshirish, uzluksiz taʼlim va turli rivojlanish xizmatlariga ixtisoslashgan boʻlib, Xelsinki universiteti qoshida tashkil etilgan. Markazning asosiy vazifalari taʼlim tashkilotlarida taʼlim sifatini taʼminlash va boshqarish, pedagoglarni tayyorlash, oʻquv dasturlarini ishlab chiqishga koʻmaklashishdan iborat.
Joriy yilning 14-may kuni Toshkent davlat iqtisodiyot universiteti binosida “El-yurt umidi” jamgʻarmasi oʻtkazilgan birinchi stipendiya tanlovi gʻoliblariga sertifikatlarni tantanali topshirish marosimi boʻlib oʻtdi. “Zamonaviy fikrlaydigan yoshlar Yangi Oʻzbekiston kelajagi!” shiori ostida oʻtgan tadbirda Jamgʻarma Vasiylik kengashi aʼzolari, sanʼatkorlar, faylasuf, adabiyotshunos va taniqli akademik-olimlar, Respublika Maʼnaviyat va maʼrifat markazi targʻibotchilari, OAV xodimlari ishtirok etishdi. Tadbirda soʻz olganlar mamlakatimizda amalga oshirilayotgan islohotlarni innovatsion va ilgʻor xorijiy tajribalar asosida qoʻllab-quvvatlaydigan yetuk malakali kadrlarga ehtiyoj kun sayin ortib borayotganligini taʼkidlashdi. Bu borada esa jamgʻarma stipendiya tanlovlarida gʻolib boʻlgan yoshlarga ulkan ishonch bildirildi. Xususan, tadbirda soʻzga chiqqan,tanlov komissiyasi a’zosi, Taʼlim sifatini nazorat qilish davlat inspeksiyasi boshligʻi Ulugʻbek Tashkenbayev jamgʻarma stipendiatlarini qutlar ekan, gʻolib boʻlgan yoshlarni xorij oʻqish va tajriba oshirish orqali kelajakda vatanimiz taraqqiyotiga hissa qoʻshishdek masʼuliyatli vazifa kutayotganligi taʼkidladi. “Avvalambor, bugungi tadbirda ishtirok etayotgan barcha yoshlarimizni “El-yurt umidi” stipendianti degan sharafli va masʼuliyatni nomga sazovor boʻlganingiz bilan chin qalbdan tabriklayman. Hurmatli Prezidentimizning yoshlarga koʻrsatib kelayotgan alohida gʻamxoʻrligidan foydalanib, davlat homiyligi ostida xorijda oʻqish va tajriba oshirishdek imkoniyat millionlab yoshlar orasidan aynan Sizlarga nasib qildi. Bugungi zamon shiddat bilan rivojlanyapti. Har kuni yangidan-yangi sohalar paydo boʻlmoqda. Ushbu zamon talabiga moslashish uchun esa bizga yirik loyihalarni amalga oshirishda innovatsion fikrlovchi, kuchli mutaxassislar juda zarur. Shuning uchun ham Siz kabi kuchli bilimli, ilgʻor xorijiy tajribalarni oʻzlashtirgan yoshlarga katta umidlar bildirilmoqda. Prezidentimiz tomonidan qanchalik ogʻir boʻlmasin bu maqsadga mablagʻ ajratayotgani bejizga emas. Barchamiz bu ulkan masʼuliyatni his qilishimiz zarur”, – dedi Taʼlim inspeksiyasi boshligʻi. Taʼkidlash lozimki, jamgʻarmaning joriy yilgi birinchi stipendiyalar tanlovida jami 420 ta oʻrin uchun 2 800 nafarga yaqin nomzod ishtirok etish istagini bildirgan. Hujjatlar respublikamizning barcha hududidagi nomzodlardan yagona tartib va teng imkoniyat asosida, onlayn rejimda va elektron tarzda qabul qilindi. Tanlovning ikkinchi bosqichi suhbat shaklida tashkil etilib, nomzodlarning xorijda taʼlim olishdan koʻzlagan maqsadi, olgan bilimlarini Oʻzbekistonda qoʻllash imkoniyatlari, maʼnaviy-axloqiy tafakkuri, sogʻlom dunyoqarashi, milliy va umuminsoniy qadriyatlarni bilishi, tanlagan mutaxassisligi boʻyicha bilim hamda koʻnikmalari darajasini aniqlashga eʼtibor qaratildi. Joriy yilning yanvar–mart oylari tashkil etilgan tanlovlar natijasiga koʻra, ulardan 114 nafari “Jamgʻarma stipendiati” deb eʼtirof etildi. Ushbu stipendiatlarning 69 nafari bakalavriat, 35 nafari magistratura va 10 nafari doktorantura taʼlim dasturlari boʻyicha dunyoning yetakchi oliy taʼlim muassasalarida oʻz bilim va koʻnikmalarini oshirishadi. Maʼlumot uchun, 2018-2022-yillar mobaynida jami 1310 nafar iqtidorli va istiqbolli yoshlar hamda soha mutaxassislari “El-yurt umidi” jamgʻarmasi stipendiati sifatida xorijdagi rivojlangan davlatlarning taʼlim muassasalari va ilgʻor kompaniyalarida taʼlim olishi va stajirovka oʻtashi tashkil etib kelinmoqda. Stipendiatlar dunyoning jami 40 ga yaqin davlatlarida, jumladan AQSH, Buyuk Britaniya, Germaniya, Fransiya, Yaponiya, Kanada, Italiya, Ispaniya, Janubiy Koreya, Xitoy, Rossiya kabi ilgʻor mamlakatlarning 240 dan ziyod universitetlari, ilmiy markazlari va nufuzli kompaniyalarida taʼlim olishib, bugungi kunda 1020 nafari mamlakatimizga qaytib kelib turli sohalarda, xususan taʼlim, ilmiy tadqiqotlar, sogʻliqni saqlash, davlat va xoʻjalik boshqaruvi hamda iqtisodiyotning turli soha va tarmoqlarda samarali faoliyat olib bormoqdalar.
Joriy yilning 13-may kuni Alisher Navoiy nomidagi Toshkent davlat oʻzbek tili va adabiyoti universitetida uzviylikni taʼminlash konsepsiyalari va uzluksiz taʼlim tizimi Milliy oʻquv dasturlari tajriba-sinoviga bagʻishlangan ilmiy-metodologik seminar oʻtkazildi. Seminar yalpi yigʻilishida Taʼlim sifatini nazorat qilish davlat inspeksiyasi boshlig‘i oʻrinbosari Odil Qoʻysinov, Alisher Navoiy nomidagi Toshkent davlat oʻzbek tili va adabiyoti universiteti rektori Shuhrat Sirojiddinov, Taʼlim sifatini nazorat qilish davlat inspeksiyasi boshlig‘i maslahatchisi Abdurahim Nosirov, Respublikada xizmat koʻrsatgan yoshlar murabbiysi Zulxumor Xolmonova, professor Baxtiyor Mengliyev, dotsent Klara Movlanovlarning maʼruzalari tinglandi. Maʼruzachilar tajriba-sinovning maqsad va vazifalari toʻgʻrisida, ona tili, adabiyot va oʻzbek tili fanlarini oʻqitilishi bilan bogʻliq islohotlar xususida oʻz fikrlarini bildirishdi. Seminarda “Yangi yaratilayotgan darsliklarni oʻqituvchilar qanday oʻqitmoqda?”, “Oʻqituvchi kitoblarisiz yangi metodikani ishlata olyaptimi?”, “Oʻquvchilar qanday qabul qilmoqda?” “Alisher Navoiy nomidagi Toshkent davlat oʻzbek tili va adabiyoti universiteti bitiruvchi kurs talabalari oʻquv dasturlari va yangi darsliklar bilan qachon tanishishadi?” kabi savollarga javob izlandi. Tadbir davomida ular xususida maxsus maʼruzalar va “Oʻzbek tilida leksik-semantik sistemalar”, “Sinonimiya”, “Milliy oʻquv dasturi asosida ona tili darslarini tashkil qilish mazmuni”, “Abdulla Oripovning hayot va ijod yoʻli”ga bagʻishlangan mahorat darslari tashkil etildi. Taʼkidlash lozimki, ona tili fani oʻquvchi shaxsida fikrlashga, oʻzgalar fikrini anglashga, oʻz fikrini ogʻzaki hamda yozma shaklda nutq sharoitiga mos ravishda toʻgʻri va ravon bayon qila olishga qaratilgan nutqiy kompetensiyani rivojlantirish, oʻquvchida til qurilishiga oid oʻzlashtiriladigan amaliy bilimlarni rivojlantirishdan iborat boʻlsa, Adabiyot fani milliy hamda jahon adabiyotining nodir namunalarini bilish asosida oʻquvchining maʼnaviy-axloqiy dunyosi, adabiy-estetik didini shakllantiradi. Oʻzbek tilini oʻqitishning maqsadi oʻzga til oʻquvchilarida oʻzbek tili faniga qiziqish uygʻotish, oʻzbek milliy madaniyatini targʻibot qilish, oʻzbek adabiyoti namunalari yordamida sogʻlom eʼtiqodli, mustaqil fikrli, axloqan barkamol, shaxsning maʼnaviy dunyosini shakllantirishga qaratilgan. Ushbu maqsadlarga asoslanib tayyorlangan, bugungi kunda tajriba sinovdan oʻtayotgan ona tili, adabiyot oʻzbek tili boʻyicha “Oʻzbekiston Respublikasi uzluksiz taʼlim Milliy oʻquv dasturlari” tarkiban: uzviylikni taʼminlash Konsepsiyalari, maktabgacha taʼlim, umumiy oʻrta taʼlim, oʻrta maxsus taʼlim, boshlangʻich professional taʼlim va oliy taʼlim oʻquv dasturlaridan iborat. Ilk bora 6-7 yoshli bolalarni maktabga tayyorlashga moʻljallab, ona tili yoʻnalishida “Maktabgacha taʼlim tizimi tayyorlov guruhi uchun nutqni rivojlantirish taʼlimiy faoliyati dasturi”, adabiyot yoʻnalishida “Badiiy adabiyot taʼlimiy faoliyat dasturi” hamda Oʻzbek tili yoʻnalishida “Oʻzbek tilini oʻrgatish taʼlimiy faoliyat dasturi” tayyorlandi va ijroga joʻnatildi. Umumiy oʻrta taʼlimda 1-11 sinflar uchun “Ona tili”, “Adabiyot”, “Oʻzbek tili” Milliy oʻquv dasturlari ishlab chiqildi. Til oʻqitishda grammatik qoidalarga asoslangan yondashuvdan kommunikativ yondashuvga oʻtish boshlandi. Boshlangʻich sinfda ona tili va oʻqish darsliklari birlashtirilib, “Ona tili va oʻqish savodxonligi” fani joriy etildi. Oliy taʼlim fan dasturlari tarkibiga koʻra quyidagilardan iborat: Ona tilida: Hozirgi oʻzbek adabiy tili, Ona tili oʻqitish metodikasi, Oʻzbek tili tarixi, Tilshunoslik nazariyasi fan dasturlari, adabiyotda: Adabiyot oʻqitish metodikasi, Adabiyotshunoslik nazariyasi, Jahon adabiyoti, Oʻzbek adabiyoti, Oʻzbek adabiyoti tarixi, Navoiyshunoslik, Oʻzbek folklori fan dasturlari hamda Oʻzbek tilida: Oʻzbek tili (nofilologik), Oʻzbek tilini oʻqitish metodikasi, Oʻzbek va rus tillar qiyosiy tipologiyasi, Hozirgi oʻzbek adabiy tili fan dasturlaridan iborat. Muhokamalar yakunida tajriba-sinovni muvaffaqiyatli oʻtkazish, kamchilik va xatolarni ochiqlash, ularni bartaraf etish uchun ayni vaqti ekanligi xususida fikr almashib, mutasaddi professor oʻqituvchilarga taklif va tavsiyalar berildi.
Joriy yilning 9–13-may kunlari Kareliya amaliy fanlar universiteti rektori janob Petri Rayvo boshchiligidagi universitet vakillari amaliy tashrif bilan mamlakatimizda boʻlib turibdi. Tashrifdan koʻzlangan asosiy maqsad, oliy taʼlim borasida oʻzaro hamkorlikning bugungi kundagi holati va uni kengaytirish boʻyicha istiqboldagi rejalarni muhokama qilishdan iborat. Mazkur tashrif rejasiga asosan, 12-may kuni Taʼlim sifatini nazorat qilish davlat inspeksiyasida Kareliya amaliy fanlar universiteti vakillari bilan uchrashuv boʻlib oʻtdi. Unda Taʼlim inspeksiyasi boshligʻi Ulugʻbek Tashkenbayev, Oliy va oʻrta maxsus taʼlim vazirining birinchi oʻrinbosari Komiljon Karimov, Finlyandiyaning Oʻzbekistondagi faxriy konsuli Alisher Joʻrayev, Kareliya amaliy fanlar universiteti rektori Petri Rayvo, universitetning xalqaro hamkorliklar boʻlimi boshligʻi Liisa Timonen hamda global taʼlim mutaxassisi Katri Truonglar ishtirok etishdi. Uchrashuv kun tartibidan Finlyandiya bilan taʼlim sohasida amalga oshirilgan hamkorlik aloqalarining bugungi kundagi holati va istiqboldagi yoʻnalishlari, Kareliya va Oʻzbekiston-Finlyandiya pedagogika instituti hamkorligi, fin ekspertlarini hududlarga jalb qilish, Kareliya universiteti bilan akademik almashuv jarayonlarida hamkorlik loyihalarini kengaytirish masalalari bilan bogʻliq qator masalalar oʻrin oldi. Muhokamalar avvalida Taʼlim inspeksiyasi boshligʻi Ulugʻbek Tashkenbayev mehmonlarga Oʻzbekistonda taʼlim sifati samaradorligini oshirish hamda Finlyandiya tajribasini joriy etishda hamkorlik uchun minnatdorchilik bildirar ekan, bu boradagi ishlar kelajakda izchil davom ettirilishini taʼkidladi. “Soʻnggi yillar davomida taʼlim sohasi mamlakatimiz iqtisodiyotining jadal rivojlanishida taʼlim sohasi alohida oʻrin tutadi. Tizimda sifat koʻrsatkichlarini oshirish boʻyicha xalqaro tajribalarni oʻrganish barobarida, yoshlarning malakali kadrlar boʻlib yetishishlari uchun qator ishlar amalga oshirib kelinmoqda. Xususan, bugungi kunda mamlakatimiz taʼlim tizimida, xususan oliy taʼlim sohasiga Finlyandiya tajribasini joriy etish orqali isloh qilishga katta eʼtibor qaratilyapti. Bu borada mamlakatingiz oliy taʼlim tizimida muvaffaqiyatli amalga oshirib kelayotgan amaliy fanlar sohasini takomillashtirish hamda taʼlim klasterlarini joriy etish, uzluksiz taʼlim tizimidagi ilgʻor tajribalarni oʻrganish Oʻzbekistonda yuqori malakali kadrlarni tayyorlash va taʼlim sifati va samaradorligini oshirishda muhim omil boʻlib xizmat qiladi”, – dedi Ulugʻbek Tashkenbayev. Shuningdek, oʻz navbatida, Kareliya amaliy fanlar universiteti rektori iliq mehmondoʻstlik uchun minnatdorchilik bildirib, Oʻzbekiston oliy taʼlim sohasiga ilgʻor tajribalarni joriy etish hamda hamkorlikning istiqbollari haqida oʻz fikrlari bilan oʻrtoqlashdi. “Oʻzbekistonga ilk marotaba kelishim. Mamlakatingiz taʼlim tizimini isloh qilish va kelajak avlodni tarbiyalashdagi ishtiyoqi meni hayratga soldi. Menimcha, bu kabi tashriflarni koʻproq amalga oshirish hamkorligimizning istiqbollari uchun ijobiy taʼsir koʻrsatishi shubhasiz. Kareliya amaliy fanlar universiteti Oʻzbekistondagi qator oliy taʼlim muassasalari bilan hamkorlikda qator loyihalarni amalga oshirib kelmoqda. Xususan, Qoʻqon xalqaro universitetidan 4 nafar talabaning universitetimizda oʻqishni boshlagani fikrimning dalili boʻla oladi. Shuningdek, ertaga biz Samarqand shahrida boʻlib, Samarqand davlat universiteti qoshida tashkil etilgan Oʻzbek-fin pedagogika instituti bilan ham hamkorlik istiqbollarini muhokama qilishni rejalashtiryapmiz. Bu albatta, erishiladigan ulkan natijalarning yakuni emas. Kelajakda mazkur aloqalar yanada kengayib, mamlakatlarimiz va madaniyatlarimiz oʻrtasida muhim koʻprik boʻlib xizmat qilishi shubhasiz. Ushbu yoʻnalishda esa oʻzaro harakatlarimizni muvofiqlashtirib, yoʻl xaritasini ishlab chiqishimiz, unda tomonlar manfaatidan kelib chiqqan holda, aniq vazifalarni belgilab olishimiz maqsadga muvofiq boʻlardi”, – dedi Petri Rayvo. Uchrashuv davomida, shuningdek, Oliy va oʻrta maxsus taʼlim vazirining birinchi oʻrinbosari Komiljon Karimov talabalar almashinuvi, qoʻshma taʼlim dasturlari bilan bogʻliq loyihalarni amalga oshirish boʻyicha istiqboldagi rejalar yuzasidan oʻz fikrlarini bildirib oʻtdi. “Taʼkidlaganingizdek, soʻnggi yillarda mamlakatimizda taʼlim tizimini isloh qilish, sohani takomillashtirishda xorijiy tajribalarni oʻrganish boʻyicha qator ishlar amalga oshirilmoqda. Shu nuqtai nazardan, Oliy va oʻrta maxsus taʼlim vazirligi nomidan mamlakatimiz taʼlim tizimiga fin tajribasini joriy etish boʻyicha harakatlaringizni yuksak qadrlaymiz. Shuningdek, bu borada amalga oshiriladigan loyihalarni qoʻllab-quvvatlashga tayyormiz. Finlyandiya soʻnggi 30 yil ichida aynan taʼlim sohasiga juda katta eʼtibor qaratdi. Bu esa mamlakatingiz farovonligi va iqtisodiy taraqqiyotiga sezilarli taʼsir koʻrsatganiga bugun barchamiz guvohmiz. Bugungi kunda Oʻzbekiston ham oʻz taraqqiyotida ushbu yoʻlni tanladi. Hozirgi kunda faqat oliy taʼlim sohasi emas balki, professional taʼlim hamda kadrlar malakasini oshirish sohalarida ham hamkorlik loyihalarini amalga oshirish boʻyicha ulkan salohiyatga egamiz. Bu borada ham Sizlardan oʻrganadigan jihatlarimiz talaygina”, – dedi Oliy va oʻrta maxsus taʼlim vazirining birinchi oʻrinbosari. Muhokamalar yakunida koʻtarilgan masalalar boʻyicha hamkorlik aloqalarini davom ettirishga hamda amalga oshirilayotgan loyihalar koʻlamini muntazam kengaytirib borishga kelishib olindi. Qayd etish lozimki, Oʻzbekiston Respublikasi Prezidentining 2020-yil 6-noyabrdagi “Taʼlim tarbiya tizimini yanada takomillashtirishga oid qoʻshimcha chora-tadbirlar toʻgʻrisida”gi qarori asosida Finlyandiya taʼlim tajribasini oʻrganish va yurtimizda samarali tatbiq qilish yuzasidan tizimli ishlar amalga oshirib kelinmoqda. Jumladan 2021-yildan Finlyandiyalik oʻqituvchilar tomonidan Toshkent, Zarafshon va Qoʻqon shaharlarida fin tilini qoʻshimcha xorijiy til sifatida oʻqitish yoʻlga qoʻyildi. Finlyandiya oliy taʼlim muassasalari bilan hamkorlikda Toshkent davlat iqtisodiyot universiteti va Toshkent davlat stomatologiya institutida qoʻshma taʼlim dasturlari qoʻyildi. Samarqand davlat universiteti tarkibida Oʻzbekiston-Finlyandiya Pedagogika instituti tashkil etildi. Shuningdek, Taʼlim inspeksiyasi rahbari boshchiligidagi delegatsiya tomonidan 2021-yilning 22-26-noyabr kunlari Finlyandiyaning taʼlimdagi tajribasi joyiga borib oʻrganildi. Tashrif doirasida hamkorlikni yanada rivojlantirish boʻyicha bir qator kelishuvlarga erishildi. Kareliya amaliy fanlar universiteti vakillarining mamlakatimizga amalga oshirgan tashrifi mazkur hamkorlik aloqalarining yanada kengayishiga xizmat qiladi.